Kryeministrja italiane, Giorgia Meloni përmes një videomesazhi të publikuar ka shprehur ngushëllimet për vdekjen e Silvio Berlusconit.
Meloni e kujton Berlusconin si një njeri luftëtar.
Sipas saj, guximi dhe vendosmëria që kishte Silvio Berlusconi e bënë atë një nga njerëzit më me ndikim në historinë e Italisë.
“Ishte një njeri që nuk kishte frikë të mbronte bindjet e tij dhe ishte pikërisht ai guxim dhe vendosmëri që e bëri atë një nga njerëzit më me ndikim në historinë e Italisë dhe që e lejoi atë për të ngulitur përparime të vërteta në botën e politikës, komunikimit, në botën e biznesit”, tha ajo.
Gjatë videomesazhit ajo thotë se mësoi nga Berlusconi të mos dorëzohej.
“Me të, Italia mësoi se nuk duhet t’i vendoste kurrë kufizime. Ai mësoi se nuk duhet të dorëzohej kurrë. Me të kemi luftuar, kemi fituar, kemi humbur shumë beteja. Dhe për të do të sjellim në shtëpi synimet që i kemi vënë vetes së bashku. Mirupafshim Silvio”, shtoi Meloni në një videomesazh.
Silvio Berlusconi ka ndërruar jetë në moshën 86-vjeçare. Ish-kryeministri italian ndodhej i shtruar prej 4 ditësh në spitalin San Raffaele të Milanos./Opinion.al
