Autoritetet italiane vijojnë hetimet për vdekjen e 26-vjeçares shqiptare, e cila humbi jetën tragjikisht në Itali pasi një makineri e rëndë paketimi i zuri kokën teksa po punonte.
Anila Grishaj humbi jetën pasditen e 15 nëntorit teksa punonte në kompaninë për produkte të ngrira, ku së fundmi ishte bërë nëndrejtoreshë.
Mediat italiane raportojnë se mes personave nën hetim është edhe shefi ekzekutiv (CEO) i kompanisë ku e reja shqiptare punonte, shtetasi Luca Ricci.
Raportohet se në ditët në vijim do të bëhet një vlerësim teknik mbi pajisjen që i kushtoi jetën 26-vjeçares, ku CEO-ja do të marrë pjesë nëpërmjet një konsulenti të tij.
Në hetim për vrasje nga pakujdesia është marrë edhe kolegu i Anila Grishajt, i cili aktivizoi makinerinë ku ajo po punonte.
Dyshohet se ajo i ishte afruar paletës për të kontrolluar dhe në atë moment kolegu, i cili nuk e pa viktimën që ndodhej tek makineria, e rindezi atë duke i zënë kokën asaj e duke i shtypur rruazat e qafës.
Sipas raportimeve nga mediat italiane, për momentin nuk ka asnjë element të dobishëm që mund të tregojë se aksidenti ndodhi pasi një element specifik sigurie nuk u respektua.
