Nuk është zhvilluar seanca dëgjimore me gazetaren Alida Tota sot në Komisionin e Medias, kjo pasi munguan deputetët e mazhorancës. Gjithashtu u ndalua edhe prania e mediave në sallë.
Tota, do të tregonte para deputetëve për arsyet që çuan në pushimin e saj si drejtoreshë e televizionit “A1 News”, por seanca ka dështuar, pasi në komision munguan disa deputetë të mazhorancës, duke e bërë të pamundur zhvillimin e saj.
Kryetari i Komisionit të Medias, Genc Pollo akuzoi kryeministrin Rama për bllokimin e seancës, duke theksuar se po kërkon të mbyllet çështja e vrasjes së të miturit Ardit Gjoklaj në landfillin e Sharrës.
Sipas Pollos, është e papranueshme që Garda nuk lejoi mediat në sallën ku zhvillohen mbledhjet e Komisionit të Medias.
Ndërkohë, nënkryetari Alfred Peza e cilësoi dëgjesën me gazetaren si një kauzë që kërkon ta amplifikojë opozita. Ai theksoi se mazhoranca nuk do të bëhet pjesë e kësaj dëgjese.
Pas gjithë debatit, Alida Tota i kthen mbrapsht kryetarit Peza manualin e gazetarise, që ai i kishte dhuruar kur Tota ishte studentja e tij.
