Partia Demokratike akuzoi Kryeministrin Rama se ka marrë në mbrojtje kreun e Partisë Socialiste të Peqinit, Edurim Teqja, i shpallur prej ditësh në kërkim pas vdekjes së 17 – vjeçarit në landfillin e Sharrës.
“Edi Rama duhet të lëshoje kreun e tij të partisë në Peqin, të mos i ofrojë mbrojtje, por ta dorëzojë para drejtësisë. Edurim Teqja është shpallur në kërkim pas vdekjes së Arditit, 17 – vjeç në landfillin e Sharrës dhe prej një jave ai i shmanget ligjit me ndihmën dhe mbështetjen e Edi Ramës. Ky akt i rëndë e bën atë të dyshuar në vdekjen e Arditit dhe Edi Ramën e nxjerr si gjithnjë mbrojtes të krimit dhe banditëve me të cilët ndan pushtetin e paratë e shqiptarëve”.
Partia Demokratike thotë se Edurim Teqja, i cili mban edhe detyrën e kreut të OSHEE -së është person me të shkuar kriminale dhe i dëbuar nga Italia për vepra të ndryshme penale. Opozita akuzon edhe Kryebashkiakun e Tiranës, Erjon Veliaj si partneri në biznesin e paligjshëm e korruptiv në Sharrë, ku humbi jetën pak ditë më parë 17 – vjeçari Ardit Gjoklaj.
Tv Klan
