Ndërsa provat pas ekzaminimit mjekoligjor forcojnë skenarin e vetëvrasjes në rastin e vdekjes së 16-vjeçares shqiptare, Maria, në Greqi, grupi hetimor i cili po merret me këtë çështje, pas insistimit të familjes se ky është një krim, nuk do ta mbyllë çështjen dhe do të vazhdojë punën për të hedhur më shumë dritë mbi ngjarjen.
Sipas avokatit të familjes Dimitris Samartzis, familja është në pritje të zbulimit të telefonatës së fundit të Marias, gjithashtu edhe të ekzaminimeve toksikologjike duke shteruar të gjitha përpjekjet e mundshme, në mënyrë që çështja të mos mbyllet derisa të sqarohet hija e misterit që zbeh çështjen.
Prindërit dhe vëllezërit e Marias janë shprehur pas funeralit të 16-vjeçares, se ata nuk e dinin që Maria kishte një lidhje me policin 26-vjeçar, dhe që atë natë vajza e tyre e kishte takuar atë.
“Motra ime u vra, ajo nuk bëri vetëvrasje. A është e mundur që një oficer policie të takojë natën me një vajzë të mitur pa e ditur prindërit e saj? Unë, ashtu si prindërit e mi, nuk dija asgjë për marrëdhëniet e Marias me këtë burrë. Unë e doja shumë Marian dhe kujdesesha për të si edhe për Kristinën, binjaken tjetër”, thotë vëllai i saj.
Ndërkohë që nëna ka shpërthyer në lot duke thënë se ajo që ndodhi ishte një krim, e se vajza e saj u vra.
“Unë dua që e gjithë e vërteta për vdekjen e Marias tonë të dalë në dritë. Nuk e dija që fëmija im ishte larguar natën, fshehurazi nga shtëpia për të takuar një oficer policie me të cilin kishte një lidhje, nga ato që mësova më vonë. Si nënë vazhdoja t’u thosha vajzave të mia binjake se duhet të kujdeseni për miqtë tuaj dhe të kujdeseni për njëri-tjetrin. Nuk e dija që Maria doli në 02:00 të mëngjesit. Kristina më tha gjithçka. Vajza ime ishte një vajzë e lumtur me dëshirë për jetën dhe nuk besoj se ka vrarë veten. Shtëpia jonë ka tre kate, ajo mund të hidhej edhe nga çatia e shtëpisë sonë për të bërë vetëvrasje dhe të mos ikte në atë zonë. Vajzën time e vranë”, thotë ajo.
Sipas informacioneve nga protothema.gr, 16-vjeçarja Maria ishte në një lidhje dashurie me një oficer policie 26-vjeçar dhe ishte ai që ajo takoi natën para vdekjes së saj.
Vajza 16-vjeçare kishte një takim me oficerin e policisë dhe sipas dëshmitarëve, atmosfera mes tyre ishte shumë e qetë dhe ato dukeshin të lumtur.
Në fakt, takimi i tyre zgjati disa minuta dhe Maria, e shoqëruar nga oficeri i policisë, u kthye në shtëpinë e saj: por ata u ndanë, pak para se ajo të mbërrinte në shtëpi, në mënyrë që lagja të mos e kuptonte që e mitura ishte në një lidhje.
Sipas informacioneve nga Siguria e Trikalës, burri 26-vjeçar ka një alibi të fortë pasi siç shihet nga një kamerë sigurie e lagjes së Marias, në orën 3:15 të mëngjesit ai e lë në shtëpia e saj dhe largohet.
Por kamera zbulon një fakt tjetër shumë të rëndësishëm dhe të mistershëm.
Me sa duket, kur polici u largua, 16-vjeçarja merr një telefonatë. Ajo iu përgjigj thirrjes dhe në vend që të hynte në shtëpinë e saj, u kthye dhe u largua. Pyetja është se kush e ka thirrur në telefon dhe pse vajza nuk ka hyrë në shtëpi pas kësaj bisede.
Siguria e Trikalës tani po kërkon të gjejë personin që telefonoi Marian. Biseda e tyre e ka bërë të miturën të largohet nga dera e shtëpisë së saj dhe të shkojë në Kishën e profetit Elias, ku vdiq në mënyrë tragjike. /Opinion.al
