Vazhdon lufta mes ministres teknike të Arsimit, Mirela Karabina dhe Sekretarit të Përgjithshëm të MAS, Plarent Ndreca që njihet si krahu i djathtë i ish-ministres Lindita Nikolla.
Prej ditësh Karabina dhe Ndreca janë përfshirë në debat publike për kompetencat pasi ministrja ka tentuar të shkarkojë punonjësit e përfshirë në fushatë, ndërsa Ndreca duket se u ka dalë në mbrojtje.
Sot kabineti i ministres njofton se Karabina ka depozituar padi në prokurorinë e Përgjithshme dhe në Prokurorinë e Tiranës.
Në njoftim thuhet se Ndreca ka kryer shkelje të rënda gjatë procesit të maturës si dhe nuk ka zbatuar VKM për fushatën.
“Kallëzim penal me Nr. 2466-M, datë 12.06.2017 për shtetasin Plarent Ndreca, Sekretar i Përgjithshëm pranë kësaj ministrie për shkelje të rënda ligjore të kryera jashtë kompetencave të funksionit të tij që cënojnë veprimtarinë e ministrisë gjatë procesit të Maturës Shtetërore 2017, si dhe detyrimeve ligjore të përcaktuara në Vendimin e Këshillit të Ministrave Nr. 473, datë 01.06.2017, “Për marrjen e masave dhe monitorimin e veprimtarisë, sjelljes apo përdorimit të burimeve njerëzore, financiare dhe logjistike të administratës shtetërore, gjatë procesit zgjedhor për zgjedhjet në Kuvendin e Shqipërisë për vitin 2017”, thuhet në njoftimin zyrtar.
Gjithashtu, Ministria e Arsimit dhe Sportit Mirela Karabina ka depozituar pranë Departamentit të Administratës Publike, kërkesën zyrtare për lirimin e menjëhershëm të z. P. Ndreca nga funksioni i Sekretarit të Përgjithshëm.
/Opinion.al
