Senatorja amerikane Martha McSally ka deklaruar se është përdhunuar nga një oficer i lartë i ushtrisë gjatë kohës kur shërbente në Forcat Ajrore. Ajo foli në një seancë ku po diskutohej mbi ngacmimet seksuale dhe abuzimet në ushtri.
“Për shumë vite gjatë karrierës sime kam qëndruar e heshtur. Më vonë, kur ushtria u përball me skandale të ndryshme dhe reagimet e tyre ishin të papërgjegjshme, e ndjeva të nevojshme t’ua thosha njerëzve. Si shumë viktima të tjera, më dukej sikur sistemi abuzonte vazhdimisht mbi mua. U largova pas 18 vitesh shërbim në Forcat Ajrore”, ka thënë McSally.
Ajo ka qenë pilotja e parë grua e Shteteve të Bashkuara të Amerikës që ka fluturuar në zona lufte. McSally shtoi se nuk ka denoncuar më parë, pasi nuk kishte besim te sistemi. Më parë, ajo ka qenë anëtare e Dhomës së Përfaqësuesve, ndërsa vitin e kaluar u zgjodh në Senat./Opinion.al
