Vazhdojnë replikat mes deputetit Sadri Abazi dhe ish-deputetit demokrat Luciano Boçi
Në një status në Facebook, Boçi shkruan se gjatë prononcimit të tij më herët, deputeti Abazi ka gënjyer për citimin e thënë. Ai e ka akuzuar atë se jo vetëm që ka prishur dy kate nga hoteli i tij por edhe në dy hotele të tjera ka kate shtesë abuzive.
Më herët ditën e sotme, ish-deputeti Boçi akuzoi deputetin socialist se po zhdukte provat se kishte ndërtuar kate shtesë pa leje në ndërtimet e tij.
Nga ana tjetër deputeti Sadri Abazi iu përgjigj akuzave duke i cilësuar si të pavërteta dhe duke nënvizuar se hoteli i tij nuk ishte shpallur i pabanueshëm. Në reagimin e tij Abazi përmendte gjithashtu faktin se kishte shkëmbyer batuta me Boçin.
Statusi i Luçiano Boçit
PËRGJIGJE PËR SADRIUN E RAMËS
Është e vërtetë që zoti Abazi ishte shumë, po shumë i qeshur sot!
Ngazëllehej me fatin tragjik të njerëzve dhe nuk ndjente aspak shqetësim për gjendjen e tyre dhe prishjen e provave.
Ai ishte aty për “bahçen” e vet.
Në vend që të angazhonte njerëz e mjete për t’i ardhur në ndihmë banorëve që kanë humbur jetë, djersë e mund, kishte angazhuar gjithçka për të mbuluar gjurmët e krimit ndërtimor dhe lejes abuzive të Gjushit e për të shpëtuar milionat e veta.
Një turp i parrëfyer ky, i bërë në mes të ditës, duke i bërë karshillëk hapur njërëzve që nuk dinë ku të fusin kokën.
Ndërkohë qytetarët denoncojnë tanimë hapur, që hotelet AS dhe HORIZONT të tij janë me kate shtesë abuzive.
Normal është i përkëdheluri i Ramës si shumë SADRINJË të tjerë.
Sa për replikën, qartazi qytetarisht ia vura në dukje atë që po bënte.
Për citimin që ka sjellë ka mashtruar publikisht.
Fjala “nëmi” është e zonës së Sadriut. Janë krejt fjalët e tij.
Këtej nga ne përdoret “mallkoi” e nuk ia vlen të zgjatem këtu pasi nuk është pjesë e fjalorit tim. Unë nuk jam as Rama e as Sadriu.
Por zakoni del me shpirtin dhe Sadriu, nën shembullin e Ramës si Sadrinjtë e tjerë, vetëm mashtrojnë abuzojnë e fshehin krime e bëjnë miliona me thasë nën rrënojat e një Shqipërie që e grabisin e vjedhin dhe e rrjepin duke qeshur, tallur e bërë show-n e neveritshëm.
Por për sërën e llojin e Ramës, Gjushit e kompani ka një ndëshkim.
Ndëshkim që do vijë nga vota e lirë e socialistëve të nëpërkëmbur e të mashtruar, nga vota e demokratëve të përndjekur këtu e gjashtë vite, nga vota e qytetarëve të cilëve u ka ardhur Rama, Sadriu, Gjushi e banda e Rilindjes, në majë të hundës. /Opinion.al
