Dy ditë më parë, De Biasi e etiketoi xheloz Hafizin gjatë intervistës në emisionin “Opinion” në “TV Klan”.
Astrit Hafizi dhe Gianni De Biasi prej shumë muajsh janë përfshirë në një debat në distancë me njëri-tjetrin. I pari një ish-trajner i Kombëtares dhe aktualisht specialist futbolli, ndërsa i dyti tekniku aktual i kuqezinjve, nuk kursejnë asgjë ndaj njëri-tjetrit.
Dy ditë më parë, De Biazi e etiketoi xheloz Hafizin gjatë intervistës në emisionin “Opinion” në “TV Klan”. Sot, ish-trajneri i kombetares i përgjigjet “timonierit” kuqezi në një intervistë për gazetën “Panorama Sport”.
“Ndoshta, i djegin ato që them unë. Kur i bëhet pyetja në përgjithësi, ai përmend menjëherë emrin tim. Edhe njeriu më i thjeshtë e kupton, çfarë lidhje ka xhelozia me mua në këtë rast? Një punë në kushte diametralisht të kundërta mes meje dhe De Biazit. Unë kam qenë trajner i Kombëtares përpara 20 vitesh, ndërsa ai tani. Vitet kanë kaluar dhe gjërat sigurisht që janë më mirë për Kombëtaren. Atë e di edhe gomari”, ka deklaruar Hafizi.
“Unë nuk mund të kem xhelozi ndaj De Biasit, pasi në atë kohë nuk kam pasur mundësi. Ajo ishte përgjigjja më me pa nivel që kam dëgjuar ndonjëherë. Në pamundësi për të gjitha ato që unë kam thënë që pas Kampionatit Europian, për përfundimin e ciklit të tij dhe që De Biazi duhet të ikë, ai merret dhe jep përgjigje si ajo e djeshmja”, shtoi ai Hafizi.
Sipas Hafizit, De Biasi jeton ende me ëndrrën e Europianit dhe përfaqësuesja po shkon poshtë e më poshtë. Ai shpreson që drejtuesit e FSHF-së t’i bëjnë gjërat më mirë dhe ta kuptojnë situatën. Madje, Hafizi insiston se italiani po bën edhe gabime në formacion.
“Një trajner që vendos Lilën në krahun e djathtë që luan bashkë me Hysajn e kupton edhe gomari që Lila nuk është për në krahun e djathtë. Ai luan me dy mbrojtës të djathtë. Por, nëse e vendos Lilën për të markuar De Shiljon vajmedet kjo punë ku ka shkuar. Mattia De Sciglio nuk tregon asgjë dhe është një futbollist krejt i zakonshëm. Për çfarë arsyeje e vendos aty Lilën?! Këtë duhet të shpjegojë De Biazi.”, ka theksuar shkodrani.
