Në një dalje për mediat, Ministrja e Mbrojtjes Olta Xhaçka foli për zjarret e ditëve të fundit, të cilat kanë djegur 245 hektarë pyje dhe kullota. Megjithëse nuk e tha hapur, Xhaçka nënkuptoi se këto zjarre janë vënë qëllimisht nga njerëz të frymëzuar nga opozita, për të krijuar pasiguri. Ajo i krahasoi zjarret me tritolin ndaj shtyllave të tensionit të lartë.
“Në një muaj janë djegur 245 hektarë pyje dhe kullota. Gjatë muajit mars janë shënuar plot 243 vatra zjarri, të shpërndara gjeografikisht në pothuajse të gjithë territorin e vendit. Mesatarisht 8 vatra zjarri në ditë, edhe pse temperaturat kanë qenë nën 20 gradë, e madje në shumë prej këtyre zonave shumë më poshtë se aq. Këto zjarre janë ndezur qëllimisht dhe janë akte kriminale. Në pjesën dërrmuese këto janë akte të pastra vandalizmi, për mos ju vënë akoma një emër tjetër në mungesë të provave konkrete që do t’i zbulojnë hetimet. Janë akte që për nga logjika e natyra u ngjajnë si dy pika uji atyre sulmeve me kallëpe tritoli ndaj shtyllave të tensionit të lartë, që ndoshta si për rastësi kanë ndodhur po gjatë të njëjtës periudhë”, ka thënë Xhaçka.
Më 18 mars, në Laç u hodh në erë shtylla e tensionit të lartë, akt për të cilin mazhoranca akuzoi drejtpërdrejtë opozitën. Ishte Ministrja e Shtetit Elisa Spiropali dhe kreu i grupit parlamentar socialist, të cilët akuzuan liderët e opozitës se po riktheheshin te tentativat e akteve të dhunës./Opinion.al
