Pasi Kuvendi nuk mundi as sot të votojë ligjin e magjistratëve të rinj pas mbylljes së seancës dhe largimit të opozitës, ka reguar kreu i grupit kuvendor të LSI, Petrit Vasili. Përmes një statusi në FB, Vasili shkruan se ky është qëndrimi i turpshëm i një mazhorance pazarxhinjsh që Reformën në Drejtësi e ka thjesht një plaçkë tregu dhe qëllimin e vetëm kapjen e drejtësisë.
STATUSI I VASILIT
Rilindja luan kungulleshkën me ligjin e magjistraturës.
Rilindja sot e bëri të qartë që Reforma në Drejtësi për të është asgjë më shumë se një pazar i rëndomtë njerëzish të rëndomtë.
Propozoi Rilindja një ligj që jepte fuqi kuvendi të vendoste për shkollën e magjistraturës për 2 vjet. Pastaj në komisionin e (anti) ligjeve ditën e fundit me logjikë ordinerësh e bëri pa afat, ulëriti dhe me demek e argumentoi dhe e votoi.
Sot rilindja propozon për një vit.
Me Kungulleshkë do ta bëjnë drejtësinë. Se kjo kungulleshkë është: themi dy vjet. Po pse dy? Po sa? Pa limit. Po pse pa limit. Po sa? Themi një vit.
Ky është qëndrimi i turpshëm i një maxhorance pazarxhinjsh që Reformën në Drejtësi e ka thjesht një plaçkë tregu dhe qëllimin e vetëm kapjen e drejtësisë.
Cili njeri serioz mund të pranojë një politikë të tillë, që ndërron sipas hallit pozicion tre herë.
Kur thotë pra të vërtetën dhe kur gënjen rilindja?
Po argumentet që rilindja dha në komisionin e (anti)ligjeve, kur hoqën çdo limit kohe dhe votuan si banditë ku shkuan, apo i harruan sikur s’ka ndodhur asgjë?
LSI ka votuar Kushtetutën dhe shtatë ligjet duke besuar te Konsensusi në 140 vota dhe tek Komisioni i Venecias dhe jo tek Rilindja që donte një reformë në drejtësi me vota të blera.
LSI beson vetëm tek parimet e Komisionit të Venecias dhe tek 21-22 korriku gjithçka jashtë tyre është riciklimi i pisët i drejtësisë së vjetër, por të kapur sot fort në grusht nga rilindja.
