Mbrojtësi i Skënderbeut, Kristi Vangjeli ka dalë sot në konferencën për shtyp ku ka folur për ndeshjen e nesër ndaj Jang Bojsit në “Elbasan Arena”.
32-vjeçari iu bëri thirrje shokëve të skuadrës për të dhënë maksimumin në këtë ndeshje dhe mos ruajnë asnjë energji për sfidën në kampionat ndaj Kukësit. Korçari tregon se skuadra i ka cilësitë për tu kualifikuar duke parë edhe kundërshtarët që ka përballë.
Ecuria pozitive në Ligën e Europës
“Ndaj Dinamos në Kiev kemi realizuam një pjesë të parë mjaft të mire dhe i kemi mundësitë dhe forcën për të bere diçka më tepër kualifikimi në grupe. E dimë që do të përballemi me ekipe të forta por asgjë nuk është e pamundur. Kemi humbur ne Kiev për një 5 minutësh jo të denjë. U goditëm në atë 5 minutësh dhe e humbëm ndeshjen. Shpresoj që nesër të na ndjek fati i mire, edhe një barazim nuk do të ishte keq për ne.”
Rëndësia e kampionatit
“Jemi optimist për një rezultat pozitiv në ndeshjen e nesërme. Sidomos pas fitores ndaj Partizanit. Të gjithë forcat duhet t’i japim nesër dhe mos mbajmë asnjë force për ndeshjen ndaj Kukësit në kampionat.”
Studimi i kundërshtarit
“Kundërshtarin e kemi studiuar nëpërmjet videove qe na ka treguar trajneri. Kanë lojtare të mirë në mesfushë dhe në fazën sulmuese. Duhen vlerësuar maksimalisht por nuk duhet te kemi frike. E kemi treguar që mund të fitojmë me ekipi më të mira se Jang Bojsi. Kanë lojtarë shumë të shpejtë dhe krijojnë hapësira në zonat përpara.”
Loja e Skënderbeut nesër
“Do të marrim këshillat e fundit nga trajneri ditën e nesërme për mënyrën e lojës. Do mundohemi të bëjmë një lojë të kujdesshme ku do të mbrohemi duke sulmuar.”
Lojtarët e rinj të afruar në skuadër
“Lojtarët e rinj e kane potencialin për të luajtur në këto nivele për ta treguar vetën që të kenë mundësi të shiten. Duhet të japin 100 % në fushe. Nuk duhet të neglizhojnë në asnjë minutë kur ju jepet mundësia”
Cilësia e grupit
“Ky grup na përshtatet jashtëzakonisht shumë. Kisha besim se do të arrinim një rezultat pozitiv në Kiev gjithsesi nuk ja dolëm. Skuadra e ka kualitetin për t’u kualifikuar. Një fitore nesër do të na fusë në lojë për të arritur kualifikimin. Arma kryesore e jona është se luajmë kompakt si ekip dhe nuk i leme hapësira kundërshtarit. Jemi mjaft të përqendruar në ndeshjet e Europë.”
Mungesa e Liridon Latifit
“Nuk është mirë të përmendim emra për lojtarë që kanë ikur. Latifi uroj të ketë një karrierë shumë më të suksesshme se te Skënderbeu. I ka cilësitë për të shkuar në një klub elitar. Ka plot lojtarë në ekip që mund të ndjekin rrugën e Latifit.”/Panorama Sport
