Pasditen e kësaj të shtune programi “Rudina” në Tv Klan u ndal në një temë mjaft interesante, udhëtimet. Të ftuarit ndanë me publikun udhëtimet e tyre më të bukura dhe ato që u kanë lënë më shumë mbresa.
Gazetarja sportive Enkeleida Zeko tregoi se është e apasionuar pas udhëtimeve me familjen. Por, kësaj here në studio ajo rrëfen një udhëtim krejt ndryshe. Më shumë se sa një udhëtim për të ka qenë një mision.
E vetme, me valixhe në dorë, drejt SHBA-ve, Enkeleida Zeko tregon se nuk shkoi për pushime, por të kryer atë që ajo e quan misionin e jetës. Ajo tregon se në atë udhëtim mësoi shumë për atë që sot e ka jo vetëm pasion, por dhe profesionin e jetës. Mësoi për gazetarinë sportive.
“Udhëtoj shuam shpesh në fakt dhe jo vetëm për punë, por edhe për të kaluar pak kohë cilësore me familjen time. Kështu që udhëtimet janë të pandara gjatë vitit tim. I organizoj, por kam dhe udhëtime të paorganizuara plotësisht. Në fakt janë edhe më të bukurat sepse janë të mbushur me shumë surpriza. Udhëtimi që kam zgjedhur si udhëtimin më të bukur, fatkeqësisht ka ndodhur që të jem e vetme.
Nuk është më i bukuri sepse kam qenë pa familjen time, përkundrazi. Kur po bisedoja më vajzën dje dhe i thashë që jam te Rudina për temën e udhëtimeve me tha ‘patjetër udhëtimi më i bukur do të jetë me mua’ dhe në fakt udhëtimet më të bukura shpirtërore janë me familjen time. Por, udhëtimi që kam zgjedhur si më të veçantin dhe që më ka lënë mbresa të jashtëzakonshme, ka qenë në SHBA dhe kam qenë vetëm. Nuk kam qenë aty për të pushuar, por të më mësuar diçka më tepër rreth diçkaje që unë tashmë nuk e kam kthyer thjesht në një pasion, por edhe në një mision të vetes, që është fuqizimi i grave nëpërmjet sportit dhe gazetarisë sportive”, tregoi Enkeleida Zeko./tvklan.al
