Evropa jugore do të vazhdojë të “digjet” edhe javën e ardhshme pasi një valë e fortë e të nxehtit do të mbulojë zonën me temperatura akoma më të larta.
Italia, Spanja dhe Greqia prej disa ditësh po përjetojnë temperatura të larta.
Ministria italiane e shëndetësisë lëshoi alarmin e kuq për 16 qytete përfshirë Romën, Bolonjën dhe Firencen për fundjavën.
Vala e të nxehtit pritet të vazhdojë edhe javën e ardhshme, me 48 gradë Celsius të parashikuara në Sardenjë, sipas mediave italiane.
Disa parashikues mendojnë se temperaturat në Sardenjë madje mund të rriten mbi rekordin evropian prej 48,8 gradë Celsius, i cili u regjistrua në Siçili në gusht 2021.
Qeveria e Italisë ka këshilluar këdo në zonat e mbuluara nga alarmi i kuq i së shtunës që të shmangë rrezet e diellit direkte nga ora 11:00 deri në 18:00 dhe të kujdeset veçanërisht për të moshuarit.
Ndërkohë, Greqia ka pasur temperatura mbi 40 geadë Celsius. Akropoli në Athinë – atraksioni më i njohur turistik i vendit – u mbyll gjatë orëve më të nxehta të së premtes dhe të shtunës për të mbrojtur vizitorët.
Periudhat e nxehtësisë intensive ndodhin brenda modeleve natyrore të motit, por globalisht ato po bëhen më të shpeshta, më intensive dhe po zgjasin më gjatë për shkak të ngrohjes globale.
Muaji i kaluar ishte qershori më i nxehtë në histori, sipas shërbimit të BE-së për monitorimin e klimës Copernicus./Opinion.al
