Ambasadori i Bashkimit Europian, Luiggi Soreca, ka njoftuar se BE, përmes një mekanizimi të ndarjes së vaksinave kundër COVID-19, ka vendosur të ndihmojë grupet prioritare në vendet e Ballkanit Perëndimor.
Përmes një statusi në Twitter, Soreca, bën me dije se BE do të sigurojë 70 milionë € grante për Ballkanin Perëndimor.
“Përmes mekanizmit të ndarjes së vaksinave, ne do të ndihmojmë grupet prioritare në vendet e Ballkanit Perëndimor. Ne do të sigurojmë 70 milion € grante për BP. Lexoni deklaratën nga Komisionerja @SKyriakidesEU sot në Parlamentin Evropian”, “, shkruan Soreca në Twitter.
Ndërkohë, Komisionerja e BE-së për shëndetësinë, Stela Kyriakides, në një status në twitter shkruan:”Komisioni Europian do të krijojë një mekanizëm Team Europe për të strukturuar sigurimin e vaksinave të ndara nga shtetet anëtare me vendet partnere të cilat ende nuk janë integruar në BE. Kjo duhet të lejojë ndarjen me vendet partnere të disa prej 2.3 miliardë dozave të siguruara përmes Strategjisë së Vaksinave të BE-së, duke i kushtuar vëmendje të veçantë Ballkanit Perëndimor, fqinjët tonë Lindorë dhe Jugorë dhe Afrikës. Komisioni Evropian dhe Shtetet Anëtare duhet të vazhdojnë të mbështesin COVAX, përmes hyrjes së hershme të vaksinave. Team Europe tashmë ka mobilizuar 853 milion € në mbështetje të COVAX, duke e bërë BE-në një nga donatorët më të mëdhenj të COVAX”.
Kujtojmë se Kryeministri Edi Rama ka kritikuar BE përsa i përket shpërndarjes së vaksinës anti-COVID në rajonin e Ballkanit Perëndimor. Ai ka theksuar se BE e la fatin e vaksinimit të njerëzve në Ballkanin Perëndimor tek marrëveshjet bilaterale mes vendeve anëtare dhe atyre jo anëtare./Opinion.al
