Që prej datës 1Tetor një vaksinë e re i është shtuar kalendarit të vaksinimit në Shqipëri. Vaksina e re, e cila i është shtuar listës është ajo për Rotavirusit, e cila do të jetë falas çdo vit për të gjithë fëmijët. Kjo vaksinë ndihmon fëmijët në mbrojtjen nga Rotavirusi dhe infeksionet që ai shkakton dhe kryesisht nga diarreja dhe të vjellat.
Lajmi u konfirmua nga ministrja e Shëndetësisë Ogerta Manastirliu gjatë një vizite në Qendrën Shëndetësore nr. 8 në Tiranë.
“Nga 1 Tetori i këtij viti është shtuar në kalendarin e vaksinimit vaksina e re e Rotavirusit, duke përafruar kalendarin tonë të vaksinimit me kalendarin europian. Është shumë e rëndësishme sepse përmirëson shëndetin e fëmijëve tanë nga virusi i rrezikshëm i Rotavirusit dhe infeksionet që vijnë prej tij. Do të përfitojnë rreth 30 fëmijë në vit. Shpesh prindërit e blinin këtë vaksinë me kosto të lartë, 100 dollarë por tashmë është falas për çdo fëmijë që lind”,-ka thënë Manastirliu.
Të gjithë fëmijët e lindur që prej datës 1 Gusht 2019 do të mund ta marrin këtë vaksinë falas si pjesë e programit kombëtar të vaksinimit, i cili ka filluar që prej datës 1 Tetor 2019.
Kjo vaksinë jepet nga goja me 3 doza në moshat 2, 4 dhe 6 muaj. Ajo është shpërndarë në çdo qendër shëndetësore sipas planeve të tyre të vaksinimit dhe është ritrajnuar i gjithë stafi mjekësor.
