Dr. Anthony Fauci është penduar për kritikat e bëra ndaj rregullatorëve britanikë të cilët kanë autorizuar vaksinën Pfizer kundër COVID-19. Fauci ka kërkuar falje, ndërsa ka shtuat se ka “besim” në komunitetin shkencor të Mbretërisë së Bashkuar.
“Në të vërtetë ka pasur një keqkuptim, dhe për këtë, më vjen keq dhe ju kërkoj falje. Unë kam shumë besim si në komunitetin shkencor ashtu edhe në atë rregullator në Mbretërinë e Bashkuar. Unë kam besim. Doli gabim dhe kjo nuk ishte mënyra se si doja të shkonte”,-tha Fauci për BBC.
Drejtori i Institutit Kombëtar të Alergjisë dhe Sëmundjeve Infektive tha të enjten se rregullatorët e Mbretërisë së Bashkuar nuk kishin kontrolluar të dhënat e vaksinës me aq kujdes sa Administrata Amerikane e Ushqimit dhe Barnave.
“Ne i bëjmë gjërat në një farë mënyre në Shtetet e Bashkuara, ndoshta pak më ndryshe, jo domosdoshmërisht më mirë ose më keq, sesa ajo që është bërë në Mbretërinë e Bashkuar, dhe unë mendoj se këtu kam rrëshqitur. E bëra të dukej sikur njëri ishte më mirë se tjetri”, tha ai.
Fauci i siguroi të gjithë se pas autorizimit vaksina është e sigurt dhe efektive. Ai shpjegoi se edhe në SHBA, kishte shumë tension lidhur me besueshmërinë, sigurinë dhe efikasitetin e vaksinave.
