Vrasja e gjeneralit iranian Kasem Soleimani, nga sulmi ajror i ushtrisë së SHBA i ka çuar marrëdhëniet mes dy vendeve në pikën më të ulët që prej vitit 1979.
Televizioni shtetëror iranian raportoi se miliona njerëz pushtuan rrugët e Teheranit për të marrë pjesë në funeralin e Soleimanit. Ata dhe lideri suprem Ajatollahu Ali Khamenei u panë duke qarë dhe duke thërritur “Vdekje Amerikës”.
Vajza e Soleimanit, Zeinab, paralajmëroi se Shtetet e Bashkuara do të përballen me ditë të zeza për vrasjen. “Hej, i çmenduri Trump, ti je simbol i budallallëkut dhe një lodër në duart e sionisteve. Mos mendo se me vrasjen e babait tim mori fund gjithçka”, tha ajo.
Këtij kërcënimi Presidenti i Shteteve të Bashkuara të Amerikës iu përgjigj me një postim në Twitter ku shkruante: “Shtetet e Bashkuara do të kundërpërgjigjen shumë shpejt dhe ashpër në mënyrë disproporcionale”.
Gjenerali do të varroset në vendlindjen e tij Kerman, ditën e martë. Ndërkohë Iraku miratoi ditën e djeshme në parlament një rezolutë jo detyruese ku i kërkonte të gjithë trupave amerikane të tërhiqeshin nga vendi i tyre. Këtij vendimi, Tump iu përgjigj se nëse kjo gjë do të ndodhte, Iraku do të përballej me sanksione tepër të rënda.
Irani nga ana tjetër njoftoi se do të tërhiqet nga të gjitha zotimet e marrëveshjes bërthamore duke lënë të kuptohet se do të rinisë me kapacitet të plotë projektin se tij për një armë bërthamore. Megjithatë SHBA i është përgjigjur kërcënimeve për luftë se ajo do të kundërpërgjigjet duke goditur menjëherë pika strategjike të Iranit. /Opinion.al
