Ka folur për mediat vajza e 80-vjeçares që humbi jetën mëngjesin e sotëm në Tiranë pasi u asfiksua nga zjarri i rënë në banesë.
Gjatë një interviste për “News 24”, vajza e viktimës tha se e moshuara ndodhej vetëm në banesë, ndërsa ajo vetë ishte në punë. Ajo tha se lajmin e mori vesh nga halla e saj e cila banonte pranë tyre, ndërsa bën thirrje për ndihmë pasi kanë mbetur pa banesë.
“Unë që kur isha lindur nuk jam ndarë nga familja ime,pasi ishim dy vajza. Kur ndodhi ngjarja unë isha në punë, burri në punë, djali në punë dhe vajza në shkollë.Nuk zgjati gjysmë ore dhe më merr halla në telefon, e cila jeton afër nesh dhe më tha se po të digjet shtëpia.Kam ardhur me një frymë, ç’të gjeja, vetëm tym dilte. Kishte ardhur policia para meje dhe nuk më la të kaloja, nuk arrita të shpëtoja asgjë. Kemi ngelur në qiell të hapur, jemi vetë i katërt, ju lutem më ndihmoni. Nuk e dinim nëse kishte dale, dola nëpër lagje ta kërkoja por nuk e gjeta”, u shpreh vajza e viktimës.
Ngjarja ndodhi në rrugën “Celo Sinani”në Tiranë, ndërsa sipas vajzës dyshohet se zjarri ra si pasojë e një shkëndije elektrike./Opinion.al
