Presidentja e Komisionit Evropian Ursula Von Der Leyen dhe kancelari gjerman, Olaf Scholz gjatë konferencës për shtyp në fund të samitit të Procesit të Berlinit kanë folur mbi çështjen Kosovë-Serbi dhe tensionet e krijuara së fundmi mes tyre.
E pyetur nëse do të ketë sanksione ndaj Serbisë në lidhje me sulmin e 24 shtatorit në Banjskë, ajo theksoi se janë duke pritur përfundimin e hetimeve mbi ngjarjen për të marrë më pas një vendim.
Ndërkohë, përsa i përket integrimit të vendeve të Ballkanit Perëndimor në BE, ajo thotë se nuk mund të ketë një datë të saktë për këtë çështje, duke shtuar se ai do të kryhet sipas një metodologjie ku do të bazohet në meritë.
“Mendoj se sulmi i tmerrshëm i 24 shtatorit, e kemi dënuar atë. Për momentin, po presim faktet për sulmet, por presim për hetimet e mëtejshme për të vendosur hapa të mëtejshëm në bashkëpunim me vendet që janë të përfshira. Sa i përket vitit 2030, nuk mund të ketë një datë të saktë, të prerë, pavarësisht reformimit apo jo. Kjo nuk do të jetë asnjëherë e pranueshme për vendet anëtare, por ju duhet të prisni deri në një datë të caktuar. 2030 do të thotë mandati tjetër jo pranimi, metodologjia e përbashkët që kemi pranuar me Këshillin Evropian, është një proces me meritë dhe është më përfituese për vendet gjithashtu, sepse janë përpjekjet dhe sukseset e tyre që i çojnë përpara dhe gjithashtu për t’i shtyrë për të marrë hapat e nevojshme. Është e bazuar në meritë. Nëse merrni përsipër reformën, do merrni financime dhe fonde. Është një proces tepër i saktësuar dhe kjo është metodologjia që kemi pranuar”, theksoi ajo.
Gjithashtu edhe kancelari gjerman, Olaf Scholz ka dënuar sulmin në Veri të Kosovës, duke thënë se Kosova dhe Serbia kanë shumë pika për të arritur.
“Thjesht do të thoja shkurt që ne e dënojmë vërtetë sulmin që ndodhi në Kosovë. Është diçka që shumë nuk do e pranojnë kurrë, është diçka shumë e qartë që BE dhe të gjitha vendet dhe Gjermania janë shumë të qartë në atë pikë. Gjithashtu ne kërkojmë që të ketë një bashkëpunim midis vendeve që suportojnë këto hetime. Është shumë e rëndësishme, jemi duke bashkëpunuar me autoritetet e Kosovës dhe kjo që po ndodh është diçka shumë e mirë. Mendoj të shtoj se situata e zhvillimit të paqes në Ballkanin Perëndimor ka nevojë për mirëkuptimin e të gjitha vendeve dhe do të funksionojnë nëse nuk janë të ndjekura nga e shkuara por shikojnë drejt së ardhmes. Kjo është arsyeja që ne suportojmë Maqedoninë e Veriut dhe Bulgarinë. Kjo është çështja që ne jemi duke punuar. Në çështjen Kosovë- Serbi ka shumë pika që duhet të arrihen”, tha ndër të tjera ai./Opinion.al
