Ish-kryeministri i Kosovës, Ramush Haradinaj, e ka cilësuar 7 Marsin, një ditë të shënuar për historinë e popullit shqiptar. Ai ka kujtuar sakrificat e mësuesve ndër breza, duke veçuar ata të viteve 90-të, të cilët sipas tij e bënë detyrën e tyre në kushte shumë të vështira.
Krahas urimit, kryetari i AAK-së, ka tërhequr shumë vëmendje dhe me fotografinë e postuar ku shfaqet me mësuesit dhe shokët e klasës së katërt.
Postimi i plotë:
Dita e Mësuesit, është një ditë e shënuar dhe shumë e rëndësishme për historinë e popullit shqiptar. Kujtoj, në veçanti, mësuesit e mi dhe gjithë mësuesit dhe mësueset shqiptare ndër breza që sakrifikuan gjithçka për të na edukuar e mësuar. Më së vështiri e patën mësuesit e nxënësit e viteve të nëntëdhjeta, të cilët në kushte shumë të vështira është dashur që të mësonin, edhe kur regjimi atëherë ua ndaloi mësimin qytetarëve të Kosovës veç pse flisnin shqip. Tashmë, mësimdhënësve të kësaj periudhe u njihen kontributet edhe nga shteti, falë një vendimi të qeverisë, për të cilin jam shumë krenar! Urime kjo datë e rëndësishme, të gjithë mësimdhënësve shqiptarë!
P.S. Në këtë foto jam unë me shokët e shoqet e klasës dhe mësimdhënësit Bajram Çekaj, Nife Haskaj dhe Miftar Çekaj.
