Emocioneve e ditës së të dashuruarve nuk u shpëtuan as politikanët shqiptarë, të cilët në këtë 14 Shkurt, u zhveshën nga kostumet e zyrtarit për të shprehur publikisht dashurinë ndaj partnerëve të tyre.
Siparin e urimeve në rrjetet sociale e hapi kreu i shtetit Ilir Meta, i cili duket se ia ka falur tradhtinë e djegies së mandateve Monika Kryemadhit.
“Gëzuar Shën Valentinin nga ne”, shkruan presidenti teksa shfaqet krah për krah me bashkëshorten e tij.
Ndërsa Lulzim Basha e kurseu një dedikim publik, por jo bashkëshortja e tij, Aurela, e cila në ditën e të dashuruarve qëndroi larg kuzhinës dhe publikoi një foto me kryetarin e Partisë Demokratike.
Kryeministrin Edi Rama 14 Shkurti e gjeti me një axhendë të ngjeshur pune në Shtetet e Bashkuara të Amerikës, por gjithsesi nuk harroi të uronte të dashuruarit nëpërmjet një video që tregon gjithë zbukurimet në kryeqytet për këtë ditë.
