Kryeministri, Edi Rama, ndodhet këtë të martë në Pescara të Italisë bashkë me rektorin e Mjekësisë Arben Gjata , ku do të marrë pjesë në ceremoninë e vitit akademik, në të cilin do t’i akordohet nga universiteti “Gabriele D’Annunzio” , titulli i nderit “Urdhri i Minervës” .
Në një konferencë për mediat në aeroportin “Abruzzo”, Rama tha me batutë se është i vetmi në qeverinë shqiptare që nuk ka titull akademikë.
Më tej kryeministri theksoi se ky titull i takon Shqipërisë dhe se qeveria po përpiqet vazhdimisht për të integruar universitetet shqiptare me programet europiane dhe ato italiane kryesisht.
“Do të kem mundësinë ta them kur të kem nderin të flas në sallën e ceremonisë, por mund të them se kur mora këtë mesazh, këtë ftesë mendova se ishte vetëm për të marrë pjesë në ceremoninë e vitit akademik. Më vonë kur kuptova se ishte më shumë dhe le të themi isha i zgjedhur nga ky universitet me reputacion të madh për të qenë përkrah personaliteteve të rëndësishme që kishin marrë më parë këtë titull nderi, u ndjeva pak në siklet sepse unë e them gjithmonë, jam i vetmi në qeverinë time që nuk kam një titull akademik. Në fund është e qartë se unë po marr diçka që i përket Shqipërisë, popullit shqiptar dhe gjithë atyre që na kanë bërë këta që jemi. “Urdhri i Minervës” është ndër titujt më të lartë të botë së akademisë.
Ky bashkëpunim është intensifikuar kohët e fundit sepse ne po përpiqemi që të integrojmë sa më shumë universitetet tona në Shqipëri dhe programet tona me ato evropiane dhe italiane kryesisht, sepse Italia është e veçantë për ne dhe vjen natyrshëm. E di që gruaja që drejton Italinë është Presidente e Këshillit të Ministrave, Ministri i Arsimit që është një “ajo” dhe Ministri i Shëndetësisë që është po ashtu “ajo”, janë këtu për këtë, jo vetëm për të marrë pjesë në ceremoni, por edhe për të nxitur drejtimin që kemi identifikuar për më shumë bashkëpunim dhe shkëmbim me universitetet italiane, dhe universiteti i këtushëm është nga ekselentët”, tha Rama për mediat italiane.
