Krahas turizmit bregdetar dhe atij historik, Shqipëria po tërheq gjithnjë e më shumë turistë edhe nga eventet sportive, kulturore dhe muzikore që po mbahen në vend.
Kreu i Unionit Turistik Shqiptar, Rrahman Kasa, thotë se evente të tilla muzikore sjellin edhe të ardhura ekonomike përveç promovimit nga fansat.
“Kemi rastin e grupit muzikor nga Berlini, Keine Musik që organizohet në datën 31 maj tek Liqeni Artificial, disa qindra fansa. Janë evente që sjellin një numër turistësh. Pikërisht evente të tilla i bëjnë jehonë promovimit të Shqipërisë për shkak të impaktit pozitiv që ata përçojnë tek qytetarët e vendeve të ndryshme. Çdo prurje turistike sjell disa të ardhura më shumë në ekonominë shqiptare”, tha Kasa.
Kasa thotë se strukturat akomoduese janë ezauruar prej kohësh nga turistët verorë dhe në evente te tilla zgjidhje janë vetëm strukturat “B & B”.
“Të gjitha strukturat akomoduese janë të ezauruara, edhe për këtë lloj kategorie që shkojnë në ‘B&b’ apo edhe hotel me dy yje”, u shpreh Kasa.
Përballë një kërkese të lartë turistike për Shqipërinë, ekspertët kërkojnë më shumë struktura akomoduese të cilat përmbushin edhe pritshmëritë për një numër të lartë turistësh në vitet në vijim. Tv Klan
