Pas arrestimit të publicistit Kastriot Myftaraj nga ana e policisë së shtetit lidhur me një shkrim për ambasadoren e BE Vlahutin, ka reaguar edhe Unioni i Gazetarëve Shqiptarë.
Nëpërmjet një deklarate për shtyp Unioni e ka konsideruar këtë një mase ekstreme dhe vlerëson se arrestimet apo burgosjet për shkak të fjalës dhe komentit të lirë në Shqipëri janë një histori e së shkuarës, e cila nuk meriton në asnjë mënyrë të përsëritet.
Më tej Unioni ka kërkuar në emër të editorëve dhe gazetarëve heqjen e prangave për publicistin dhe aplikimin e penaliteteve ligjore të cilat nuk parashikojnë vetëm burgimin për shkak të fjalës apo publikimit.
“Liria e fjalës dhe e shprehjes duhet të bashkëjetojë me parimet dhe normat etike. Komuniteti i mediave dhe sidomos ai i gazetarëve dhe editorëve shqiptarë le ta pranojnë këtë rast si një mundësi për distancim nga shkeljet dhe përdhosjet etike në komunikimet përmes mediave dhe atë publik”, thuhet në njoftimin e këtij insitucioni. /opinion.al
