Pjesa shqiptare e liqenit të Ohrit është vënë nën mbrojtjen e UNESCO-s. Pjesa e re që vihet në mbrojtje përfshin gadishullin e vogël të Linit dhe shiritin e tokës përgjatë bregut që lidh gadishullin me kufirin e Maqedonisë së Veriut.
Ekspertët e UNESCO-s vlerësojnë shumë fenomenet natyrore që mbart liqeni, si një strehë me lloje të shumta endemike të faunës dhe florës së ujërave të ëmbla që datojnë nga periudha terciare.
Në gadishullin e fshatit piktoresk të Linit ndodhen të dhëna arkeologjike siç janë gjurmët e një kishe të krishterë që i përket mesit të shekullit të VI.
Gjithashtu në tre vende në afërsi të bregut të liqenit ka dëshmi të një grumbulli banesash prehistorike.
Përgatitja e dosjes që mori po-në e UNESCO-s, ishte rezultat i një pune 4 vjeçare të ministrive të Kulturës dhe Turizmit e Mjedisit, pjesë e projektit “Drejt një qeverisje të përbashkët të trashëgimisë natyrore dhe kulturore ndërkufitare të Rajonit të liqenit të Ohrit”.
Liqeni i Ohrit ishte shpallur nga UNESCO trashëgimi botërore që në vitin 1979, por ishte përfshirë vetëm pjesa e Maqedonisë së Veriut. /Opinion.al
