Kryeministri Edi Rama ka deklaruar në rubrikën “Sy m’sy”, se kushdo që nuk përballon dot humorin e satirën, duhet të rrijë jashtë politikës.
Ai tha se nuk shan asnjëherë por pranoi se bën humor, gjë që sipas tij i bezdis shumë ata që ka kundërshtarë.
“Nuk jam këtu për shaka, patjetër bëj humor që i bezdis shumë ata që janë kundërshtarë të mitë. Më vjen keq, por unë nuk bëj dot ndryshe. Se unë nuk shaj, nuk ul njerëzit o kriminel, o maskara, o qen bir qeni…
Këto janë forma barbare! Më pëlqen të përdor satirën. Para ca ditësh është postuar në këtë faqe një episod i një krijimi të dy të rinjve që ma kanë dërguar, një teatër kukullash i lezetshëm, një mënyrë për të dhënë një mesazh kuptimplotë. Është sulmuar faqja nga një tufë e madhe kandidatësh të një subjekti politik të rinj.
E vetmja gjë që mund të kuptoj nga ai sulm është vjetërsia e mendjes së tyre. Kush nuk është në gjendje të përballojë humorin e satirën, nuk duhet të merret me politikë. Është potencialisht i rrezikshëm!”, tha Rama.
