“Unë jam polic”. Kështu ka deklaruar përpara gjykatës në Itali paraditen e së martës 27-vjeçari Klisman Nikolli, efektiv i policisë së Lezhës, i cili u arrestua në vendin fqinj së bashku me dy persona të tjerë Viktor Bilani 30-vjeç dhe Flor Koca 35-vjeç. Ata u arrestuan për vjedhje të banesave në zonat e Veneto dhe Friuli.
Mediat e huaja shkruajnë se Nikolli së bashku me dy bashkëpunëtorët e tij u arrestuan nga autoritetet italiane në momentin që do të largoheshin nga Italia në drejtim të Shqipërisë.
Ata u kapën në dhomën e hotelit me valixhet e bëra gati për t’u larguar.
Të tre akuzohen për 18 raste vjedhjesh të banesave në Portogruaro, Concordia Sagittaria, Musile di Piave dhe San Michele al Tagliamento.
Në dy shtëpi në Chions kanë marrë 2000 Euro dhe në një tjetër kanë vjedhur 9000 Euro dhe disa orë.
Grabitësit shqiptarë përdornin një automjet BMW kur kryenin vjedhjet e banesave. Më pas ndërronin makinë dhe përdornin Ford Mondeo. Ata u zbuluan më 16 Nëntor, kur një banor parandaloi vjedhjen e banesës së tij dhe ndoqi hajdutët me makinë dhe njoftoi policinë.
Pas arrestimit në Itali, efektivi Klisman Nikolli u përjashtua nga Policia Shqiptare me urdhër të drejtorit Muhamet Rrumbullaku ditën e martë./Opinion.al
