Kryeministri Edi Rama, i shoqëruar nga ministri i Rindërtimit, Arben Ahmetaj dhe kryetari i Bashkisë së Shijakut, Elton Arbana ishin në Maminas ku i dorëzuan çelësat e shtëpisë, të moshuarës Besnike.
Gjatë vizitës së tij kryeministri ka inspektuar edhe punimet e bëra në zonë për shtëpitë e dëmtuara nga tërmeti dhe nuk ka kursyer disa kritika për inxhinierët e projektit.
Si pari ai ka kërkuar që ulluqet e banesës të ndërtohen sipas projektit. Më tej kryeministri theksoi se është “bojaxhi” për të nënvizuar se projektit i mungon elementi i thyerjes në ngjyrë.
Arbana: Zonja është e ve dhe invalide. Dhe duke ju referuar edhe vendimit të Këshillit Bashkiak që kemi në sistemin e pikëzimit kemi nisur shtëpinë e parë për zonjën.
Rama: Ndërtuesi kush është? Ju jeni firma. E para ato ullukët nuk lihen që të rrjedhin aty. Ato duhen përfunduar me rrjedhje siç është projekti dhe e dyta unë jam bojaxhi, mungon një element i projektit. Projekti ka një thyerje në ngjyrë. Jemi dakord, të them akoma apo i dini vetë detajet e tjera, se shoh edhe detaje. Bukur shumë janë por ullukët të shkojnë sipas projektit, që të mos bjeri ujë atje sikur po bien gjyma nga çatia edhe ngjyrën./ Opinion.al
