Pasi publikuam rastin e humbjes në mënyrë të çuditshme të unazës mijëradollarëshe të At Shtjefën Gjeçovit, rrëfyer nga At Zef Pllumi në intervistën e dhënë disa vite më parë për gazetarin Blendi Fevziu, interesante mbetet edhe historia se si At Shtjefën Gjeçovi e gjeti këtë unazë aty në fillim të viteve 1900, dhe se si me mençurinë e tij e ruajti nga tundimi për ta shitur…
Ja rrëfimi I At Shtjefën Gjeçovit në vitin 1900
“Ishe n’Laç – Sebaste të Kurbinit, si i parë famulliet, si gjejshe t’knaqun n’kërkim të vjetërsinave –përmi t’cillat tash flas, – m’u beh në qelë Dr. Paal Traeger prej Zehlendorfit t’Berlinit. I vlerti anthropolog e arkeolog, i cili atbotë pat fillue dishka me belbue taljanisht, e unë si burr i madh(!) xuna me ju lëvdue për do sende t’vjetra t’cillat i pata gjet mun n’atë kohë m’nji vorr në vend t’qujtun “Kodër Bogëz” në katund të Laçit – Sebaste.
Dr. Traegeri mu lut me ja diftue visarin tem, edhe unë me njerzie ja qita përpara. E pvetshe herë për nji send herë për nji tjetër, e ky rrapçap me me atë gjuhë taljane, u mundote me mi kallxue do punë përmbi ato vjetërsiena.
Ndër kto sende kishe edhe nji unazëarit t’cillën e pata gjetë n’vorr të vendit të përmendun, dhe e pveta Dr. Traegerin, qi t’më diftote kohën e vjetërsienës s’sajë, e ky mu përgjegj: “Kohën e vlerën s’mund ta kallxoj, se na arkeologët jena të betuem me mos kallxue as kohën as çmimin e vjetërsievet, por po deshte me e shitë, unë po të nap mje m’7 (shtatë) napolana për atë unazë”!!
Të falem nderës i thaçë Dr. Traegerit, me më dhanë 400 napolana s’e shes, por veç deshta me ditë kohën e çmimin e vjetërsies…”.
