Ka rinisur pasditen e sotme protesta e banorëve të Unazës së Re në kryeqytet, të cilët kundërshtojnë prishjen e banesave të tyre, siç e parashikon projekti për ndërtimin e Unazës së Madhe. Banorët janë vendosur pranë mbikalimit, duke bllokuar të dyja akset e rrugës që kalon aty.
Deputetja demokrate Albana Vokshi, e pranishme në protestë, në një prononcim për gazetarët nga terreni, tha se, në takimin e djeshëm në bashki me kryebashkiakun e Tiranës Erjon Veliaj, nuk ishin protestues, por punonjës së bashkisë.
Dje kanë qenë me Veliajn punonjës së administratës, tha Vokshi, e cila shtoi se Veliaj po përpiqet të mashtrojë.
“Ju ftoj të bëni transparence për mbledhjen e Veliajt në bashki me banorë të pretenduar të Unazës së Re. Personat në foto në takim me Veliajn janë policë bashkiake. Janë punonjës se bashkisë, janë rrogëtare të Veliajt. Me intrigën e tij, Veliaj kërkon të mashtrojë banorët, por nuk ka për t’ia arritur. Ftoj të gjitha mediat, edhe kombëtare, që të hetojnë për ketë takim dhe për projektin korruptiv. Si nënë kam një apel për të gjithë shqiptaret në ketë ditë të bashkimit që të solidarizohen me protestën dhe kauzën e drejtë të banoreve të Astirit”, tha Vokshi.
Ndërsa deputeti tjetër demokrat Klevis Balliu foli me emra.
“Dje, Veliaj, nëpërmjet një filmi artistik, ku takonte banorët e Astirit, u mundua të mashtronte qytetarët. Ata njerëz ishin punonjës së bashkisë, polica të bashkisë: Redi Ruka dhe Blerim Mela, Emiljano Baliu nga Skrapari, inspektor në policinë bashkiake, Pirro Zogaj nga Tepelena, inspektor”, tha Balliu.
“Pra një mashtrim i shëmtuar i Veliajt për tu munduar të krijojë përçarje te këta qytetarë, por jo që nuk ia ka dalë, por vetëm ka shtuar numrin e protestuesve. Siç janë qytetarët te bulevardi, që pasi i premtuan se di jepnin paratë, sot i kanë hequr nga lista e shpronësimeve që vetë i kishin vënë. Sot, i janë bashkuar kësaj kauze. Dua të shpreh krenarinë e të qenit mes këtyre qytetrëve që kanë qëndruar këtu duke i bërë ballë kësaj klike mafioze të Edi Ramës dhe Erjon Veliajt”.
“Nëse Veliaj do ti takojë banorët, ja ku i ka, këtu, nga mëngjesi deri në darjë. Le të vijë ti takojë edhe ti pyesi. Deri tani kemi parë shpjegime, por pa zgjidhje. Protesta e Unazës së Re i çori maskën Veliajt dhe gjithë qeverisë së Rilindjes. I përshëndes protestuesit dhe i garantoj se mbështetja e PD do të jetë me ta deri ditën e fundit, deri në ditën kur do marrin dëmshpërblimet”, përfundoi ai.
