Kryetari i Bashkisë së Tiranës Erion Veliaj ka publikuar pamjet në facebook nga kantieri i ndërtimit për Unazën e Madhe. Ai thotë se aktualisht po punohet me ritme të shpejta në segmentin nga Farka në drejtim të Shkozës. “Me përkushtimin dhe dëshirën e madhe për zhvillim, Tirana vijon punën me veprën më të re infrastrukturore, që do të lehtësojë trafikun në Unazën e Madhe, segmenti lindor që kalon nga Farka drejt Shkozës”, shkruaj Veliaj.
Kujtojmë se projekti i Unazës së Madhe konsiston dhe në shembjen e mbi 300 objekteve, banesa dhe biznese përgjatë gjithë gjurmës nga kalon rruga. Prej një muaji janë duke u zhvilluar protesta kundër shembjeve të objekteve. Protestat kanë qenë sporadike në lagjen Shkozë, ndërsa tek Unaza e Re protesta është masive pasi në këtë aks është numri i më i madh i banesave që pritet të shemben. Në mbështetje të banorëve protestues është edhe opozita.
