Mazhoranca në Komisionin e Ligjeve vendosi sot që të bëjë lëshime për të përjashtuarit nga vetingu. Gjyqtarët e prokurorët e shkarkuar mund të marrin licencë dhe të punojnë si avokatë. Më herët PS ishte deklaruar kundër. Po kështu qendrim ka ndryshuar edhe Maks Haxhia i Dhomës së Avokatisë.
Ulsi Manja më 2 maj, kur ligji për avokatinë u prezantua në parim: Natyrisht ne nuk mund të lejojmë të hyjnë nga penxherja ata që kemi nxjerrë nga dera e sallës së gjyqit.
Bashkim Fino më 2 Maj: Unë jam shumë dakord me këtë, madje do propozoj masa më shtrënguese.
Maks Haxhia, kreu i Dhomës së Avokatisë më 2 Maj: Ne nuk mund të bëhemi strehë për ata që i nxjerr jashtë vettingu, duam një profesion dinjitoz.
Por këtë të martë, teksa u miratua nen për nen ligji për avokatinë, nuk u vendos asnjë kriter ndalues që licencën ta marrin dhe ata që i djeg vettingu. Shqetësimi u ngrit sërish nga Bashkim Fino, por relatori Adnor Shameti tha se të skualifikuarit nga vettingu nuk mund të pushkatoheshin, raporton televizioni “Report Tv”.
Bashkim Fino sot, 3 Korrik: Mos bëni sikur nuk e kuptoni? Pse do të bëheni ju strehë e këtyre njerëzve. Të ndërrojnë profesion
Ulsi Manja sot, 3 Korrik: Ky është një profesion i lirë, punojnë mbi 10 mijë veta
Maks Haxhia, sot 3 Korrik: Nga ana morale z. Fino ka të drejtë, por jo nga ana principate. Është profesion i lirë.
