Rusia ka goditur qytetin e dytë më të madh të Ukrainës, Kharkiv-in, me një valë të fuqishme sulmesh ajrore, përfshirë dronë dhe bombardues, duke shkaktuar vdekjen e katër personave dhe plagosjen e gati 60 të tjerëve. Siç shkruan BBC, në një tjetër sulm rus në Kherson, në jug të Ukrainës, janë raportuar edhe dy viktima të tjera.
Kryetari i Bashkisë së Kharkivit, Ihor Terekhov, deklaroi se gjatë natës, mbi qytet janë përdorur 48 dronë, dy raketa dhe katër bomba të drejtuara nga ajri. Sulmet kanë vazhduar edhe pas mesnate, me raportime për përdorim të bombave ajrore.
Ndërkohë, Moska ka deklaruar më herët se vala masive e sulmeve me dronë dhe raketa në mbarë Ukrainën, ishte një përgjigje ndaj “akteve terroriste nga regjimi i Kievit”, duke iu referuar sulmeve të fundit mbi infrastrukturën hekurudhore dhe bazat ajrore në territorin rus.
Në Kharkiv, janë goditur rreth 18 pallate banimi dhe 13 shtëpi të tjera. Kështu ka njoftuar kryetari i bashkisë, i cili shtoi se mes të plagosurve janë edhe një foshnjë dhe një vajzë 14-vjeçare.
Guvernatori i rajonit të Kharkivit, Oleh Synehubov, bëri të ditur se një kompleks industrial civil u sulmua nga 40 dronë, një raketë dhe katër bomba ajrore, duke shtuar se ka dyshime se mund të ketë ende njerëz të bllokuar nën rrënoja.
Ministri i Jashtëm i Ukrainës, Andriy Sybiha, u bëri thirrje aleatëve ndërkombëtarë që të rrisin presionin ndaj Moskës dhe të marrin “masa shtesë për të forcuar mbrojtjen e Ukrainës”.
Vetëm dy netë më parë, 6 qershor, në të gjithë territorin e Ukrainës, gjashtë persona humbën jetën dhe 80 të tjerë u plagosën, kur Rusia sulmoi me më shumë se 400 dronë dhe gati 40 raketa.
