Ukrainasit duhet të konsiderojnë largimin nga vendi për të ndihmuar në kursimin e energjisë, ka thënë kreu i firmës më të madhe private të energjisë në Ukrainë.
Sulmet me raketa ruse kanë dëmtuar sistemin energjetik të Ukrainës, me autoritetet që paralajmërojnë se Kievi mund të përballet me një “mbyllje të plotë” të rrjetit të energjisë elektrike me fillimin e dimrit.
Në një intervistë me BBC, Maxim Timchenko, shefi ekzekutiv i firmës energjetike DTEK, tha se sistemi i energjisë elektrike i Ukrainës bëhet më pak efektiv me çdo sulm rus.
Reduktimi i konsumit të energjisë elektrike është çelësi për ta mbajtur atë në punë, tha Timchenko. Ai tha:
Nëse ata mund të gjejnë një vend alternativ për të qëndruar edhe për tre ose katër muaj të tjerë, do të jetë shumë e dobishme për sistemin.
Ai tha se ukrainasit duhet ta shohin largimin nga vendi si një mënyrë për të ndihmuar vendin e tyre të fitojë luftën kundër Rusisë.
Nëse konsumoni më pak, atëherë spitalet me ushtarë të lënduar do të kenë furnizim të garantuar me energji elektrike. Kështu mund të shpjegohet se duke konsumuar më pak ose duke u larguar, kontribuojnë edhe te njerëzit e tjerë.
Presidenti i Ukrainës, Volodymyr Zelenskiy, tha se rreth 10 milionë njerëz ishin pa energji elektrike, duke e përshkruar situatën e energjisë elektrike në më shumë se një duzinë rajone si “shumë të vështirë”./Opinion.al
