Në Ukrainë zhvillohen sot zgjedhjet presidenciale, ku në garë janë 39 kandidatë. Gjithsesi, sipas sondazheve vetëm tre prej tyre kanë shanse reale për të fituar. Ky është raundi i parë i votimeve, ku nëse askush nuk do të fitojë mbi 50% të votave, dy kandidatët më të votuar do të shkojnë në balotazh më 21 prill.
Të tre kandidatët që kanë shanse për të fituar janë pro-europinanë, ndërsa asnjë filorus nuk shihet si favorit në këto zgjedhje.
Yulia Tymoshenko ka qenë kryeministre e Ukrainës dhe është një ndër politikanet më të famshme, e cila në vitin 2005 udhëhoqi të ashtuquajturin “revolicionin portokalli” e që më pas u dënua me shtatë vite burg nga qeveria filoruse mbi disa akuza të dyshimta.
Favorit për një mandat tjetër është edhe presidenti aktual i Ukrainës, Petro Poroshenko, i zgjedhur në këtë post në vitin 2014. Ai është shumë i pasur falë zotërimit të një fabrike çokollatash.
Surpriza e këtyre zgjedhjeve është Vladimir Zelenskiy, aktor komik 41-vjeçar, i cili në një televizion në Ukrainë luan rolin e një mësuesi që arrin të bëhet president. Zelenskiy punon në televizionin e oligarkut ukrainas Kolomoyskyi, i cili është kundërshtar i Poroshenkos. Sipas sondazheve më të fundit, Zelenskiy kryeson këto zgjedhje me 25% të votave./Opinion.al
