Sekretari i Përgjithshëm i NATO-s, Jens Stoltenberg, ka paralajmëruar se ditët në vijim në Ukrainë “ka të ngjarë të jenë më keq se tani” me forcat ruse që pritet të sjellin armatim më të rëndë dhe të vazhdojnë sulmet e tyre në të gjithë Ukrainën.
Duke folur pas një takimi të jashtëzakonshëm të ministrave të jashtëm të NATO-s, Stoltenberg e përshkroi pushtimin rus të Ukrainës si “agresionin më të keq ushtarak në Evropë për dekada”.
“Me qytete nën rrethim, shkolla, spitale dhe ndërtesa banimi të granatuara. Veprime të pamatura rreth një centrali bërthamor mbrëmë dhe shumë civilë të vrarë ose të plagosur”-tha ai.
“Ditët që do të vijnë ka të ngjarë të jenë më të këqija, me më shumë vdekje, më shumë vuajtje dhe më shumë shkatërrim”, vijoi më tej Stoltenberg deklaratën.
