Një delegacion i UEFA-s me në krye Thierri Favre, drejtorin e zhvillimit të federatave në këtë institucion kanë shikuar ditën e sotme ecurunë në stadiumin ‘Arena Kombëtare’.
“Për mua është një kënaqësi që të jem këtu. Ju kujtoj se pata dhe fatin të jem edhe 2 vjet më parë, në momentin e prezantimit të projektit. Dhe sot kemi ardhur bashkë me arkitektin dhe përfaqësuesit e FSHF-së për të parë se si po ecin punët në terren. Ne e dimë që ky është projekt fondamental për të ardhmen e futbollit shqiptar dhe vjen pas dy projekteve shumë pozitiv në Elbasan dhe Shkodër. Shpresojmë që të shikojmë këtu në kryeqytet një impiant sportiv të ditëve tona. E dimë që, sipas planeve, do të përfundojë në shkurt, apo në mars të vitit të ardhshëm, dhe për ne është një gjë shumë pozitive” shprehet Favre në një deklaratë për mediat.
Gjithashtu ai shprehet se ky stadium është kandidat për tu zhvilluar edhe finalja e Superkupës së Evropës për vitin 2020 dhe tha se është i kënaqur nga ecuria e punimeve të bëra deri më tani.
Stadiumi i ri kombëtar pritet të ketë një kapacitet prej më shumë se 22 mijë vendesh dhe do ti ketë të gjitha kriteret e duhura për tu luajtur një finale e një kompeticioni evropian.
