Është testuar këtë të martë sistemi i votimit elektronik në Elbasan. Kreu i KQZ-së, Ilirjan Celibashi, pa nga afër funksionimin e sistemit. Ai tha se votimi elektronik është 100% i sigurtë nga pikpamja e sigurisë dhe se garanton fshehtësinë e votës.
Sakaq, një nga operatorët e KQZ-së shpjegoi konkretisht procedurat se si funksionon votimi dhe numërimi elektronik.
Pasi të futet në Qendrën e Votimit (QV), votuesi do të kryejë procesin e identifikimit nëpërmjet indentifikimit biometrik. Më pas Kryekomisioneri i QV-së do të hapë procesin e votimit nëpërmjet një butoni.
“Qytetari do të vendoset përpara pajisjes. Në fillim do t’i dalë gjithë lista me kandidatët përkatës, zgjedh atë kë preferon ai. Shtyp ‘konfirmo votën’. Në rast se qytetari ka zgjedhur gabim, ka alternativën ‘Ndrysho’. Kur e shtyp mund të kthehet përsëri dhe shtyp atë që kishte në plan të parë. ‘Konfirmo’, pas kësaj del e gjithë lista me këshillat bashkiakë me partitë përkatëse. Zgjedh të preferuarin e tij, pastaj zgjedh “printo votën”, pastaj “konfirmo” dhe këtu qytetari ka mbaruar procesin e votimit. Vota e tij shfaqet elektronikisht për konfirmimin e tij dhe më pas prihet dhe futet direkt në kutinë e votimit pa e prekur askush”, shpjegoi operatori për Klan Neës.
Kujtojmë që Elbasani është një nga zonat ku do të votohet në mënyrë elektronike në zgjedhjet vendore të 14 Majit, bashkë me Kamzën dhe Vorën. Këto janë zgjedhjet e dyta ku eksperimentohet votimi dhe numërimi elektronik në vendin tonë.
