Kryeministri Edi Rama ka reaguar përsëri këtë të shtunë lidhur me akuzat se ka shpenzuar 22 milionë euro për udhëtime jashtë vendit.
Përmes një postimi në “Twitter”, Rama shkruan se ndjen neveri për gënjeshtrat e përhapura nga opozita, e cila sipas tij po tallet me publikun.
Kreu i qeverisë ka publikuar shifra nga shpenzimet e tij për udhëtimet jashtë vendit, ku sipas tij, në vitin 2012 ka shpenzuar 226.893 Lek të reja, ndërsa në vitin 2020, 193.331 Lek të reja.
Rama shton se këto shpenzime përgjatë 2 vite e 9 muaj janë më pak se gjysma e shpenzimeve që ka kryer Sali Berisha kur ishte kryeministër.
“Si të mos ndjesh neveri për rublaxhinjtë e opozitës dhe gjobaxhinjtë e ekraneve, përhapës gënjeshtrash e shpifjesh, katranë me bojë që tallen me publikun! Shpenzimi mesatar vjetor i Kryeministrit për udhëtimet jashtë 2012 226.893Lek të reja 2020 193.331Lek të reja”, shprehet ai.
“Pra në 2 vite e 9 muaj të përdorimit të avionin promocional Albania me një marrëveshje të favorshme me Air Albanian, udhëtimet e mia u kanë kushtuar taksapaguesve mesatarisht më pak se gjysma e shpifarakut më të ulët në historinë e Shqipërisë, kur fatkeqësisht ishte kryeministër”, shkruan me tej Rama në një postim në Twitter./Opinion.al
