Gjatë një takimi me qytetarët në Bulqizë, kryeministri Edi Rama iu përgjigj akuzave të ish-kryeministrit Berisha për udhëtimet me charter.
Rama iu përgjigj Berishës me shifra duke bërë një krahasim të udhëtimit të tij në vitin 2021 me një udhëtim të Berishës në vitin 2010. Rama tha se një udhëtim i tij i ka kushtuar taksapaguesve shqiptarë 650 mijë lekë të vjetra, ndërsa një udhëtim i Berishës 2 milionë e 500 mijë të vjetra.
“Keni dëgjuar mbrëmë besoj që unë kam një taksi që fluturon. Do ta dëgjoni këtë gjë përditë nga hienat që nga mëngjesi deri në të gdhirë. Kanë vetëm këtë punë, si të shfrytëzojnë këtë periudhë të vështirë të Shqipërisë. Mund ti thonë të gjitha, por në fund janë shifrat, ka fatura të paguara. Po të krahasojmë vit me vit, 2021 me 2010, u kushtoi 4 herë më pak shqiptarëve kosto udhëtimi. Për një udhëtim të hienës kostoja ishte 2.5 mln, për mua është 650 mijë të vjetra. Kjo është e vërteta, ndërkohë me atë taksinë time, vijnë gazetarë plot dhe nuk paguajnë asgjë, ashtu sikundër nuk jam vetëm unë, janë edhe delegacionet, duke mos marrë badigardë siç merrte hiena se kishte hall se e sulmonin se ishte i bukur shumë, duke mos ndenjur aty ku mund të kthehesh brenda ditës, kjo është ksotoja. As unë asnjë ministër nuk udhëton me bussines class, të gjithë ekonomik, për taksinë ua tregova. Ai avioni është promocion për Shqipërinë”-u shpreh Rama.
Kreu i qeverisë shqiptare sqaroi se kur shoqërohet nga gruaja e tij dhe djali i tij, bileta tyre paguhet nga buxheti i shtëpisë.
“Asnjëherë në asnjë rast unë nuk shkoj i shoqëruar nga gruaja apo bashkë më djalin me shpenzimet të shtetit, përveçse kur është ajo është ftuar. Në pjesën tjetër kur më shoqërojnë mua, paguajmë nga buxheti i shtëpisë për biletën”, tha ai.
Në konferencën për media të ditës së sotme kreu i PD Sali Berisha akuzoi Ramën se ka shpenzuar 22 milionë euro me 137 udhëtime charter.
