Institucioni i Presidencës ka publikuar të gjitha udhëtimet jashtë shtetit të Ilir Metës, që ka data që është zgjedhur në këtë post deri në ditët e fudit. Sipas një njoftimit të shpërndarë për mediat, theksohet që nga data 24 korrik 2017, deri në gusht të vitit 2019 presidenti Meta ka realizuar: 59 vizita shtetërore, zyrtare dhe pune jashtë vendit, nga të cilat 36 prej tyre me avion.
Nga 36 udhëtimet me avion, Presidenti Meta nuk ka udhëtuar asnjëherë me First Class apo Charter. Presidenti ka udhëtuar kryesisht me Business Class (26 udhëtime), por edhe me Economic Class (10 udhëtime), vlera e të cilave është : Për vitin 2017: 7156 euro (bileta avioni); Për vitin 2018: 24384 euro (bileta avioni); Për vitin 2019: 24217 euro (bileta avioni).
“Udhëtimi kryesisht në Business Class është zgjedhur si mundësi për udhëtim të sigurtë, që garanton fleksibilitetin e ndryshimeve të itinerareve të udhëtimit për shkak të axhendës, pa paguar kosto shtesë, si dhe ka garanci të plotë në transferimin e bagazheve”, njofton Presidenca.
Gjatë viteve 2017, 2018 dhe 2019, Presidenti ka qëndruar në total 141 ditë jashtë vendit. Vlera totale e trajtimit financiar me dietë të përfituara për 141 ditët e qëndrimit jashtë vendit ka qenë në vlerat: 12600 euro dhe 4260 USD.
Trajtimi me dietë i Presidentit të Republikës realizohet në zbatim të Vendimit të Këshillit të Ministrave Nr.870, Datë 14.12.2011 “Për trajtimin financiar të punonjësve që dërgohen me shërbim jashtë vendit”, Lidhja 1.
Nga 59 vizita shtetërore, zyrtare dhe pune që Presidenti i Republikës ka realizuar jashtë vendit, vlera totale e shpenzuar për akomodimin në hotel jashtë vendit nga buxheti i Institucionit të Presidentit është në vlerën 19322 euro./ Opinion.al
