Uanda Nara, bashkëshortja dhe menaxherja e Mauro Ikardit, njëherësh opinioniste e emisionit sportiv “Tiki Taka” mbrëmë pas mesnate ndryshoi retorikë dhe vendosi që të sqarojë të gjithë ngjarjet e javës së fundit, me ndryshimet drastike për Icardin.
E përlotur, dhe ndryshe nga çfarë kishte shprehur më parë, ish-modelja argjentinase, përpara të gjithë Italisë, konfirmoi se ajo dhe futbollisti duan të qëndrojnë tek Interi. Ky është reagimi i parë publik nga çifti pas vendimit të klubit zikaltër për t’i hequr Ikardit shiritin e kapitenit.
“Bashkë me shiritin, Mauros I hoqën edhe një këmbë. Ai është krenar për këtë skuadër dhe shiritin, ndërsa nuk ka luajtur asnjëherë për para”, ka thënë Uanda Nara, që më pas ka provuar të japë sinjale paqeje për klubin dhe tifozët e Interit.
“Kjo skuadër është familja jonë dhe nuk duam të largohemi. Nuk kemi kërkuar asnjëherë rinovimin”, është shprehur bashkëshortja e Ikardit.
Direkt në emisionin sportiv ka ndërhyrë edhe administratori i deleguar i Interit, Bepe Marota, i cili ka forcuar edhe një herë bindjen e tij se vendimi për heqjen e shiritit të kapitenit ishte marrë vetëm për të mirën e Interit dhe nuk ishte një ndëshkim për sulmuesin argjentinas./E.M
