Pak kohë pas shpalljes në kërkim, policia ka arrestuar dy kushërinjtë e parë dhe bashkëpunëtorin e tyre që tentuan të vrasin shokun pas një sherri në palestër.
“Arrestohen tre shtetas të shpallur në kërkim për “Vrasje me dashje” të kryer në bashkëpunim e mbetur në tentative” dhe për “Prodhim dhe mbajtje pa leje e armëve luftarake dhe municionit“njofton sot policia.
Policia bën me dije se në pranga u vunë shtetasit David Xhihani 30 vjeç, Arben Xhihani 29 vjeç dhe Lorenc Merkoqi, 24 vjeç të tre banues në Kavajë.
Kapja dhe ndalimi i tyre është bërë pasi me datë 18.03.2016, tek rruga e Qelqit Kavajë në ambjentet e një palestre, pas një zënke për motive të dobëta shtetasit David Xhihani dhe Arben Xhihani (kushërinj të parë), janë konfliktuar fizikisht me shtetasin S. F.
“Në konflikt e sipër , shtetasi Arben Xhihani ka qëlluar me armë zjarri pistoletë ,shtetasin S. F . Nga të shtënat e armës së zjarrit shtetasi S. F. ka pësuar lëndime të gjymtyrëve të poshtme (në këmbë) dhe është jashtë rrezikut për jetën” njofton policia.
Shtetasit e dyshuar si autorë, u identifikuan nga policia që në momentin e parë të ndodhjes së ngjarjes dhe u shpallën në kërkim ku u kapen dhe u ndaluan sot.
Nga veprimet hetimore të kryera rezultoi se përveç kushërinjve Xhihani, bashkëpunëtor dyshohet të jetë dhe shtetasi Lorenc Merkoqi i perfshirë në këtë ngjarje, i cili u ndalua gjithashtu. Me cilësinë e provës materiale u sekuestrua arma e krimit pistoletë tip ZStava dhe tre fishekë./Panorama.al
