Gjykata kundër Korrupsionit dhe Krimit të Organizuar, ka urdhëruar nisjen e procedimit penal ndaj anëtarit të Këshillit të Lartë Gjyqësor, Alban Toro. Sipas News24, procedimi penal ndaj Alban Toros është kërkuar për akuzën e falsifikimit të dokumenteve, kur u zgjodh anëtar i Këshillit të Lartë Gjyqësor.
Toro u padit në SPAK nga Shoqata e Avokatëve, por Prokuroria e Posaçme vendosi mosfillimin e procedimit penal. Ndërkohë vendimi i SPAK u rrëzua nga Gjykata e Posaçme dhe gjyqtarja Ilirjana Olldashi caktoi nisjen e procedimit penal.
Toro akuzohet se ka falsifikuar të dhënat, që kanë të bëjnë me ushtrimin e profesionit si avokat 10 vite pa ndërprerje. Sipas ligjit anëtari i KLGJ duhet të ketë 10 vite pune avokat pa ndërprerje. Ndërkohë që gjatë periudhës 2010-2018, Alban Toro e ka pezulluar 3 herë aktivitetin e tij si avokat. Këto janë të dhëna të regjistruara në qendrën kombëtare të biznesit. Konkretisht rezulton se Toro është regjistruar në QKB për të ushtruar profesionin si avokat në datën 16 Nëntor 2007.
Duke ju referuar, po të dhënave të QKB rezulton se Alban Toro nga data 02 Mars 2010 deri në datën 20 shtator 2011 e ka pezulluar ushtrimin e aktivitetit si avokat për afro 1 vit e gjysmë. Më pas, ai e ka ushtruar profesionin nga data 20 shtator 2011 deri në datën 27 shkurt 2018.
Por aktiviteti ka rinisur brenda 2 muajsh, për t’u pezulluar sërish në 21 dhjetor 2018, kohë kur mori detyrën si anëtar i KLGJ me mandat 5-vjeçar, i vlefshëm deri në dhjetor 2023./Opinion.al
