Bashkia e Tiranës ka vendosur që të emëroj 4 rrugë të kryeqytetit me emrat e 4 dëshmorëve të atdheut.
Lajmin e bëri të ditur sot kryetari i Bashkisë Tiranë, Erion Veliaj, gjatë mbledhjes së Këshillit Bashkiak.
Bëhet fjala për 4 efektivët e policisë Fatos Xhani, Kastriot Feska, Saimir Duçkollari dhe Altin Dizdari, të cilët humbën jetën në krye të detyrës, në një aksion për të arrestuar Dritan Dajtin pranë plazhit “Iliria” në Durrës në 2009.
“Nga Drejtori i Policisë së Republikës së Shqipërisë, Gledis Nano, kemi marrë një propozim për të emërtuar në kryeqytet një kryqezim me 4 rrugë në emër të katër Dëshmorëve të Policisë të rënë në një aksion. Ka qenë një aksion për të cilin ende flitet dhe ende ka diskutime. Këta punonjës të policisë ranë në një aksion për të kapur një organizatë kriminale. Është një kryqëzim i ri në Njësinë 1, aty ku është një rreth rrotullimin i madh, ku kemi bërë një investim të ri të zgjerimit të Lanës. Do jenë këto 4 akse që puqen në këtë kryqëzim të ri që do marrin emrat e këtyre katër dëshmorëve të atdheut”,-ka thënë Veliaj.
