Elbasani u trondit nga dy vrasje brenda 12 orëve. Pas vrasjes së 23-vjeçarit Regis Runaj, mëngjesin e sotëm është vrarë me sende të forta dhe 40-vjeçari Florian Lamçe.
Policia deklaron se Lamçe mbeti i varë pas një konflikti me dy persona të tjerë pranë qendrës së këtij qyteti. Personat e përfshirë në konflikt dhe që akuzohen për vrasjen e Lamçes janë Adriano Hajdari, 42 vjeç, Sokol Sanxhaktari, 34 vjeç, të cilët aktualisht janë shoqëruar nga policia.
Sipas policisë, personat e përfshirë në konflikt ishin në gjendje të dehur. Lamçe ishte person me precedent penal, ndërsa dyshohej se ishte përfshirë në disa ngjarje të rënda kriminale. Sipas “News 24” Lamçe është i dyshuar për disa vrasje. Po ashtu, sipas informacioneve të tjera 40-vjeçari dyshohet se është i përfshirë dhe në trafikun e lëndëve narkotike.
Florian Lamçe, është vëllai i Olti Lamçe, i cili është i dënuar me 24 vite burg për vrasje. Në vitin 2012 Olti vrau pronarin e disko “Tekilës”, Almir Canin.
Motivi i konfliktit
Më 22 shkurt të vitit 12 Prokuroria e Elbasanit ka paraqitur konkluzionet përfundimtare për vrasjen me armë zjarri Almir Cani. Autori kryesor, pas hetimeve të prokurorisë, rezultoi shtetasi Olti Lamçe. Në kuadër të këtij hetimi, prokuroria ka arritur të faktojë edhe rolin e shtetasve Florian Lamçe dhe Kliton Gjyla, të cilët kanë kryer veprime të drejtpërdrejta për të penguar zbulimin e së vërtetës. Sipas dosjes penale, ngjarja zë fill rreth një vit e gjysmë para vrasjes, kur Almir Cani, bashkë me nipin e tij kanë shkuar për të bërë një palë shkallë në banesën e S. Furrxhiut. Sipas prokurorisë, puna është kryer ngadalë për shkaqe të ndryshme. Në muajin dhjetor të vitit 2011 dhe janar të vitit 2012, mes nipit të Canit dhe S. Furrxhiut kanë filluar kontradiktat në lidhje me vlerën e punës. Gjatë kësaj kohe E. Cani i ka kërkuar S. Furrxhiut paratë për punën e kryer. Në kohën që janë bërë këto debate, i pranishëm ka qenë edhe Almir Cani. Pas shumë debateve, Cani dhe nipi i tij kanë shkuar në banesën e Furrxhiut, me qëllim që t’i kërkonin paratë për punën e bërë, por ai nuk ua ka hapur derën e banesës.
Vrasja e Canit
Më 16 shkurt 2012, Almir Cani ka qenë në lokalin e tij, kur aty ka shkuar nipi i tij dhe një i njohur i nipit. Almiri ka thirrur në lokal shtetasin Olti Lamçe, i cili thirret Ola dhe një person tjetër të paidentifikuar me emër. Në bisedë e sipër, Almiri i ka kërkuar Oltit dhe personit tjetër që të shkonin së bashku me nipin e tij te farmacia e djalit të borxhliut për t’i bërë presion. Pasi kanë shkuar te farmacia, ata kanë filluar t’i kërkojnë shpjegime djalit të borxhliut. Në këto kushte, shoku i nipit të Almirit ka nxjerrë pistoletën dhe ka kërcënuar djalin e Furrxhiut. Pas kësaj, familja Furrxhiu ka denoncuar në polici dhe për këtë është thirrur Almir Cani, bashkë me nipin. Pasi kanë dalë nga komisariati, Almir Cani ka kërkuar shtetasin Olti Lamçe, bashkë me vëllain e tij, Florian Lamçe. Në dosje thuhet se Cani ka nxjerrë emrin e Oltit në polici dhe për këtë arsye, marrëdhëniet mes tyre janë ftohur. Kështu, më 22 shkurt, ata kanë lënë takim në lokal dhe Almiri është thirrur nga vëllai i Oltit. Almiri kur po zbriste nga banesa për në lokal është takuar me Oltin, i cili e ka goditur me levë në kokë dhe më pas me plumb po në kokë. Pasi ka kryer vrasjen, Olti Lamçe është larguar nga vendi i ngjarjes. Më 8 mars 2012, pas marrjes së informacionit se Olti dhe Florian Lamçe po përgatiteshin të largoheshin jashtë vendit, policia ka ndërhyrë dhe i ka arrestuar të dy. Gjithashtu, policia ka arrestuar edhe bashkëpunëtorin tjetër, Kliton Gjyla, që ishte i bashkëpandehur me dy vëllezërit./ Opinion.al
