Ish-kryetari i Komunës së Velipojës, Pashko Ujka, ishte i shoqëruar nga gruaja dhe vëllai i tij në momentin që iu bë atentat mbrëmjen e sotme.
Ndërkohë mësohet se e tronditur pas atentatit bashkëshortja e tij ka deklaruar se ishin duke ecur kur 64-vjeçari ra në tokë papritur.
“Ishim duke ecur në rrugë kur ra papritur në tokë” u shpreh gruaja e ish-deputetit Pashko Ujka.
Sipas abc news, fakti që u qëllua me silenciator, por edhe nxitimi nga reshjet e dendura të shiut dhe stuhia ka bërë që gruaja e Ujkës dhe vëllai të mos pikasin asgjë në lidhje me autorët.
“Nuk pamë asgjë” tha më tej ajo për grupin hetimor që ka nisur punën për të shkuar në gjurmët e autorëve të krimit. “Probleme nuk kemi pasur me askënd” ka thënë gruaja.
Pashko Ujka, ish-kryetari i komunës së Velipojës ndërroi jetë në spital mbrëmjen e sotme , pasi u qëllua pranë shtyllës kurrizore. Ai fillimisht u transportua në spital, në gjendje kritike por nuk ka arritur t’iu mbijetojë plagëve të marra.
