Në Japoni, Partia Konservatore në pushtet dhe opozita kanë arritur një marrëveshje, sipas së cilës do të kompensohen financiarisht të gjithë personat që mes viteve 1948 dhe 1996 iu nënshtruan me detyrim sterilizimit pas dyshimeve se kishin sëmundje gjenetikisht të transmetueshme apo vonesa mendore.
Ligji parashikon një kompensim prej rreth 25 mijë eurosh për çdo person që i është nënshtruar sterilizimit dhe do të votohet në Parlament muajin e ardhshëm. Gjithsesi, i gjithë faktori politik është dakord dhe votimi pritet të jetë thjesht një formalitet.
Deri në vitin 1996, rreth 25 mijë njerëz u sterilizuan në bazë të ligjit “për mbrojtjen gjenetike”. Të paktën 16,500 prej tyre nuk dhanë miratimin për procedurën, ndërsa në 70% të rasteve ishin gra ose vajza, madje edhe 9-10 vjeçare.
Në janar, një prej grave që ishte sterilizuar me detyrim, i bëri thirrje qeverisë japoneze për të kompensuar të dëmtuarit, gjë që u arrit shumë shpejt mes dy partive kryesore.
Gjithsesi Koji Niisato, një ndër avokatët e grave që kanë kërkuar kompensimin financiar, ka thënë se kjo gjë nuk e zhbën dëmin e shkaktuar./Opinion.al
