Dy persona janë arrestuar nga policia në Bulqizë, pasi iu prezantuan si punonjës policie një 36-vjeçari në rrugë dhe i morën me forcë një shumë parash.
Uniformat blu njoftojnë se ngjarja ka ndodhur mbrëmjen e së martës të 21 majit 2024.
“Menjëherë pas kallëzimit të një 36-vjeçari, se rreth orës 22:00 të datës 21.05.2024, 2 shtetas që i ishin prezantuar si punonjës policie, i kishin marrë me forcë, në rrugë, një shumë të vogël parash, Komisariati i Policisë Bulqizë ka organizuar punën për identifikimin dhe kapjen e autorëve.
Si rezultat i veprimeve të shpejta hetimore dhe policore, të kryera në kuadër të operacionit “Prezantimi”, u vunë në pranga shtetasit D. T., 26 vjeç (i dënuar disa herë, për vepra penale kundër personit dhe pronës) dhe V. B., 36 vjeç, të dy banues në Bulqizë””, njofton policia.
Materialet procedurale i kaluan Prokurorisë së Dibrës, për veprime të mëtejshme, për veprat “Vjedhja me dhunë” dhe “Përvetësimi i titullit apo i detyrës shtetërore”.
